،NDA میں کامیاب کیڈٹس کے والدین کی عزت افزائی؛جموں و کشمیر اور لداخ کے کیڈٹس کی نمایاں کامیابی؛ 12 لاکھ روپے سے زائد ترغیبی رقم تقسیم
جان محمد
نگروٹہ؍؍سینک اسکول نگروٹہ میں تعلیمی سیشن 2026-27کے لیے انویسٹیچر تقریب بڑے وقار اور جوش و خروش کے ساتھ منعقد ہوئی، جس میں نیشنل ڈیفنس اکیڈمی کے 154ویں کورس میں منتخب ہونے والے آٹھ کیڈٹس کے والدین کو اعزاز سے نوازا گیا۔تقریب کا آغاز ایک جذباتی اور فخر انگیز لمحے سے ہوا جب ان کیڈٹس کے والدین کو اس شاندار کامیابی پر مبارکباد پیش کی گئی جنہوں نے این ڈی اے کے 154ویں کورس میں شمولیت اختیار کی۔ جن کیڈٹس کے والدین کو اعزاز دیا گیا ان میں اخلاق حسن، حسینین، پرنو شرما، آدتیہ کمار سنگھ، پرتھوی راج سمبیال، دیویانش بھردواج، پیوش شرما اور یاسر مختار وانی شامل ہیں۔
اس موقع پر وزارتِ دفاع کی جانب سے اسکول کو موصول ہونے والی بارہ لاکھ روپے سے زائد کی ترغیبی رقم والدین کے حوالے کی گئی، جو ان کی محنت اور کیڈٹس کی کامیابی کا اعتراف تھا۔این ڈی اے کے لیے منتخب ہونے والے یہ کیڈٹس جموں و کشمیر اور لداخ کے مختلف علاقوں کی نمائندگی کرتے ہیں، جو سائنک اسکول نگروٹہ کے ہمہ گیر کردار اور وسیع رسائی کی عکاسی کرتا ہے۔ یہ کامیابی اس بات کا ثبوت ہے کہ ادارہ مسلسل نوجوان قیادت کو فروغ دے رہا ہے اور انہیں مسلح افواج میں خدمات انجام دینے کے قابل بنا رہا ہے، جو قومی تعمیر کے عمل میں اہم کردار ادا کرتے ہیں۔
تقریب کے دوران تعلیمی سیشن 2026-27کے لیے 15 نئے کیڈٹ لیڈرز کو باقاعدہ طور پر ذمہ داریاں سونپی گئیں۔ اہم عہدوں میں راگھو چِب کو اسکول کیپٹن، ادے کمار کو اسکول ایڈجوٹنٹ، آدرش کمار تیواری کو اسپورٹس کیپٹن، ایشان پریہار کو کلچرل کیپٹن اور اتکرش وویک کو بینڈ کیپٹن مقرر کیا گیا۔نو منتخب کیڈٹس نے اپنے عہدوں کا حلف اٹھاتے ہوئے ادارے کی روایات، نظم و ضبط اور اقدار کو برقرار رکھنے کا عہد کیا۔ تقریب میں والدین، اساتذہ اور کیڈٹس کی بڑی تعداد نے شرکت کی، جس سے یہ لمحہ اسکول برادری کے لیے یادگار بن گیا۔
تقریب سے خطاب کرتے ہوئے پرنسپل کیپٹن (آئی این) شیبو دیواسیا نے این ڈی اے میں منتخب ہونے والے کیڈٹس کے والدین کو مبارکباد پیش کی اور ان کی رہنمائی و حمایت کو سراہا۔ انہوں نے کہا کہ سینک اسکول میں قیادت کی ذمہ داریاں طلباء میں خوداعتمادی، دیانتداری اور افسرانہ صلاحیتوں کو فروغ دینے کی مضبوط بنیاد فراہم کرتی ہیں۔تقریب کا اختتام والدین کے ساتھ ہائی ٹی ملاقات پر ہوا، جہاں کامیابی، قیادت اور قومی خدمت کے جذبے کو خراجِ تحسین پیش کیا گیا، اور اس عزم کا اعادہ کیا گیا کہ سینک اسکول نگروٹہ آئندہ بھی جموں و کشمیر اور لداخ کے نوجوانوں کو قوم کی خدمت کے لیے تیار کرتا رہے گا۔