جموں؍؍جامعہ جموں کے شعبہ ہوم سائنس (ہیومن ڈیولپمنٹ) کی جانب سے سوربھی نرسری اسکول اور ڈے کیئر سینٹر کے بچوں کے لیے ”مائل اسٹون ڈے” کے عنوان سے گریجویشن تقریب منعقد کی گئی، جس میں ننھے طلبہ کی تعلیمی پیش رفت کو سراہا گیا۔
تقریب کی مہمانِ خصوصی مینا شرما نے شعبہ کی کارکردگی کو سراہتے ہوئے کہا کہ سوربھی نرسری اسکول ابتدائی تعلیم کے میدان میں ایک بہترین مثال ہے، جو بچوں کی ذہنی، سماجی اور جذباتی نشوونما میں اہم کردار ادا کر رہا ہے۔
مہمانِ اعزاز پروفیسر مونیکا چڈھا نے کہا کہ بچپن کے ابتدائی سالوں میں سازگار ماحول بچوں کی تخلیقی صلاحیتوں اور سیکھنے کی بنیاد کو مضبوط بناتا ہے، اور اس سلسلے میں شعبہ کی کاوشیں قابلِ ستائش ہیں۔
شعبہ ہوم سائنس کی سربراہ ساریکا منہاس نے اپنے استقبالیہ خطاب میں بتایا کہ سوربھی نرسری اسکول 1998 سے کامیابی کے ساتھ چل رہا ہے اور یہ نہ صرف بچوں کی ہمہ جہت ترقی میں مددگار ہے بلکہ طلبہ کے لیے عملی تربیت کا بھی اہم ذریعہ ہے۔
تقریب میں بچوں نے رقص اور موسیقی کے رنگارنگ پروگرام پیش کیے، جن سے ان کی صلاحیتوں اور اعتماد کا بھرپور اظہار ہوا۔ اس کے علاوہ بچوں اور والدین کے لیے انٹرایکٹو سرگرمیاں بھی منعقد کی گئیں تاکہ باہمی تعلق کو مضبوط بنایا جا سکے۔
پروگرام کا ایک خاص حصہ ”ہیلتھی اسنیکنگ مقابلہ” تھا، جس میں والدین نے صحت بخش اور منفرد غذائی اشیاء پیش کیں۔ اس مقابلے کا فیصلہ ڈاکٹر ارچنا بھٹ اور پروفیسر مونیکا چڈھا نے کیا۔
اس موقع پر پروفیسر راجنی ڈھنگرا اور پروفیسر نیرو شرما نے بھی خطاب کرتے ہوئے شعبہ کی کاوشوں کو سراہا۔
پروگرام کی نظامت ایم ایس سی ہیومن ڈیولپمنٹ کے طلبہ نے کی جبکہ نرسری اساتذہ ممتا سنگھ، پوجا بھٹ، سیما شرما اور دیگر عملے نے کامیاب انعقاد میں اہم کردار ادا کیا۔