جموں؍؍جموں و کشمیر بی جے پی کے میڈیا انچارج ڈاکٹر پردیپ مہوترا نے پارٹی ہیڈکوارٹر تریکوٹہ نگر میں ایک روحانی تقریب کے دوران ”ماں باوے والی نال نال” کے عنوان سے ایک بھجن البم جاری کیا۔
یہ پروگرام بی جے پی سنسکرتی، آرٹ اینڈ کلچر سیل کے کو-کنوینر ساحیل مہاجن کے زیر اہتمام منعقد ہوا، جس میں سنجے بخشی، ستیش شاستری سمیت دیگر پارٹی رہنما بھی موجود تھے۔
یہ بھجن معروف گلوکار ندا سلیم کی آواز میں پیش کیا گیا، جس نے اپنی دلکش اور روحانی دھن سے حاضرین کو مسحور کر دیا۔ گیت کے بول راجو ہری پوریہ نے تحریر کیے، موسیقی بلیک لائف اسٹوڈیوز نے ترتیب دی جبکہ ویڈیو کی ہدایت کاری کے کے ملہوترا نے کی۔
اس موقع پر ڈاکٹر پردیپ مہوترا نے کہا کہ ماں باوے والی جموں کے عوام کے دلوں میں خاص مقام رکھتی ہیں اور انہیں ہمیشہ اس خطے کی محافظ تصور کیا جاتا ہے۔ انہوں نے کہا کہ یہ بھجن صرف ایک موسیقی تخلیق نہیں بلکہ عقیدت مندوں کی جانب سے پیش کیا گیا ایک روحانی نذرانہ ہے، خاص طور پر نوراتری سے قبل اس کی ریلیز اسے مزید اہم بناتی ہے۔
انہوں نے عوام سے اپیل کی کہ وہ مقامی فنکاروں کی حوصلہ افزائی کریں اور اس طرح کی ثقافتی سرگرمیوں کو فروغ دیں تاکہ جموں کی روحانی اور فنی وراثت کو عالمی سطح پر اجاگر کیا جا سکے۔
ساحیل مہاجن نے کہا کہ بی جے پی کا سنسکرتی سیل علاقائی ثقافت اور فنون کے فروغ کے لیے پرعزم ہے اور مستقبل میں بھی نئے فنکاروں کو مواقع فراہم کیے جائیں گے۔
گلوکار ندا سلیم نے اس موقع پر اپنے اساتذہ اور بی جے پی قیادت کا شکریہ ادا کیا اور بھجن کی چند لائنیں پیش کر کے حاضرین کو مزید محظوظ کیا۔