ریاض؍؍سعودی عرب کی سپریم کورٹ نے باضابطہ اعلان کیا ہے کہ عید الفطر 1447ھ بروز جمعہ 20 مارچ 2026ء کو منائی جائے گی۔ یہ اعلان اس لیے کیا گیا کیونکہ بدھ 18 مارچ کی شام سعودی عرب میں کہیں بھی شوال کا ہلال نظر نہیں آیا، جس کے نتیجے میں ماہ رمضان المبارک 30 دن کا ہوگا اور مسلمان جمعرات 19 مارچ کو بھی روزہ رکھیں گے۔
سعودی سپریم کورٹ نے 18 مارچ کی شام ملک بھر کے مسلمانوں سے شوال کا چاند دیکھنے کی اپیل کی تھی اور اس مقصد کے لیے پورے ملک میں رصد گاہیں متحرک کی گئی تھیں۔ تاہم ملک کے مختلف حصوں میں ابر آلود موسم اور بارش کی وجہ سے چاند کی رویت ممکن نہ ہو سکی۔ کمیٹی نے تمام مقامات سے موصول ہونے والی رپورٹس کا جائزہ لینے کے بعد اعلان کیا کہ شوال کا ہلال کہیں دکھائی نہیں دیا۔
اس اعلان کے بعد سعودی عرب کے ساتھ ساتھ متحدہ عرب امارات، کویت، قطر، بحرین، یمن، عراق، فلسطین اور لبنان سمیت خلیج اور عرب دنیا کے متعدد ممالک نے بھی جمعہ 20 مارچ کو عید الفطر منانے کا سرکاری اعلان کر دیا۔ ترکی اور آسٹریلیا نے بھی اسی تاریخ کی تصدیق کی ہے۔
عید الفطر اسلامی تقویم کے دسویں مہینے شوال کی پہلی تاریخ کو منائی جاتی ہے اور اس کا آغاز شوال کے ہلال کی رویت سے مشروط ہوتا ہے۔ ماہ رمضان المبارک روزوں، عبادت، تلاوتِ قرآن اور روحانی ریاضت کا مہینہ ہوتا ہے اور عید الفطر اس مبارک مہینے کی کامیاب تکمیل پر اللہ تعالیٰ کا شکر ادا کرنے کا دن ہے۔
عید کے روز مسلمان صبح سویرے عید کی نماز ادا کرتے ہیں، نئے لباس زیب تن کرتے ہیں، ایک دوسرے کو مبارکباد دیتے ہیں اور صدقہ فطر ادا کر کے غریبوں اور محتاجوں کو بھی خوشیوں میں شریک کرتے ہیں۔ سعودی عرب کی وزارت برائے انسانی وسائل نے نجی شعبے کے ملازمین کے لیے 18 مارچ بدھ کی شام سے چار روزہ عید تعطیلات کا اعلان پہلے ہی کر دیا تھا۔
بھارت میں عید الفطر 21 مارچ بروز ہفتہ کو منائے جانے کا امکان ہے کیونکہ برصغیر میں چاند کی رویت عموماً خلیجی ممالک سے ایک دن بعد ہوتی ہے۔ تاہم حتمی اعلان نماز مغرب کے بعد مقامی رویتِ ہلال کمیٹیوں کی جانب سے کیا جائے گا۔