جموں؍؍لیبر کمشنر جموں و کشمیر نے شرم بھون جموں میں مختلف اداروں کے نمائندگان اور افسران کے ساتھ ایک اہم اجلاس کی صدارت کی، جس میں نئے لیبر کوڈز کے نفاذ اور لائسنسنگ طریقہ کار پر تفصیلی گفتگو کی گئی۔
اجلاس میں جموں ضلع کے مختلف معروف اداروں جیسے کے سی پلازہ، ویونتا، مووی ٹائم، والمارٹ، جیو، بلنک اٹ اور دیگر کاروباری اداروں کے نمائندگان نے شرکت کی۔ اس دوران صنعت سے وابستہ افراد، ایچ آر منیجرز اور جنرل منیجرز سے رجسٹریشن، لائسنسنگ، معائنہ اور ضابطہ عمل سے متعلق فیڈبیک حاصل کیا گیا۔
میٹنگ میں اس بات پر زور دیا گیا کہ لائسنسنگ کے عمل کو آسان بنایا جائے، شفافیت کو فروغ دیا جائے اور مختلف محکموں کے درمیان بہتر ہم آہنگی قائم کی جائے تاکہ کاروباری سرگرمیوں کو سہولت مل سکے۔
لیبر کمشنر کو بزنس ریفارم ایکشن پلان (BRAP) کے تحت لیبر و ایمپلائمنٹ ڈپارٹمنٹ کا نوڈل آفیسر مقرر کیا گیا ہے۔ اس حیثیت میں وہ اصلاحاتی اقدامات کی نگرانی، بین المحکماتی رابطہ، بروقت رپورٹنگ اور طے شدہ اہداف کے مطابق پیش رفت کو یقینی بنائیں گے۔
اجلاس میں شرکاء نے زمینی سطح پر درپیش مسائل سے آگاہ کیا اور محکمہ کی جانب سے مشاورتی انداز اپنانے کو سراہا۔
اس موقع پر ڈپٹی لیبر کمشنر جموں شکپل سنگھ، اسسٹنٹ لیبر کمشنر روپالی جسروٹیا اور روپالی گندوترا سمیت دیگر افسران بھی موجود تھے۔
لیبر کمشنر نے اس عزم کا اعادہ کیا کہ ایک جانب کاروبار کے لیے سازگار ماحول فراہم کیا جائے گا جبکہ دوسری جانب مزدوروں کے حقوق کے تحفظ اور فلاح و بہبود کو بھی یقینی بنایا جائے گا۔